Сөй гомерне, сөй халыкны, сөй халыкның дөньясын!



Котлыйбыз


Баш бит - Хәбәрләр - «Фермер утраучыгы»нда ниләр бар?
26.05.2022

«Фермер утраучыгы»нда ниләр бар?

Ижау шәһәренең Клубная урамында урнашкан «Пятерочка» кибетендә беренче «Фермер утраучыгы» ачылды.

Удмуртиядә сыйфатлы, экологик чиста продукция җитештерүче җирле фермер хуҗалыклары күп булса да, без аларны белмибез дә диярлек. Шуны истә тотсак, аларга да үз продуктларын халыкка тәкъ­дим итү, зур сәүдә үзәкләрендә сату нокталары оештыру авыр. Шуңа күрә күбесе үз казанында кайный. Бу авырлыклар турында һәрвакыт сөйләнелсә дә, күзгә күренердәй ярдәм булганы юк иде. Шушы көннәрдә боз урыныннан кузгалды дияргә була. Клубная урамында урнашкан «Пятерочка» кибетендә беренче «Фермер утраучыгы» ачылды. «Кече һәм урта эшмәкәрлек субъектлары» корпорациясенең әлеге проекты Удмуртия Башлыгы Александр Бречалов ярдәмендә тормышка ашырылды. Бүгенге көндә мондый «утраучык»лар Уфа, Новосибирск, Омск, Иваново шәһәрләрендә уңышлы эшли. Ел дәвамында Россиянең тагын егермеләп шәһә­рендә шундый сату нокталары ачылалак.
Исеме җисеменә туры да килә. Зур кибетнең бер почмагында Удмуртиядә җитештерүчеләр про­дукциясен сату утраучыгы оеш­тырылган. Биредә сөт, ит продукциясе, ярымфабрикатлар, бал, үлән чәйләре, майлар сатыла. «Проект нигезендә фермерлар продукциясе халыкка якыная. Без беребез дә Удмуртиядә җи­тештерелгән сыр яки май эзләп, ерак авылга бармыйбыз. Ә монда көндәлек азык-төлек алырга килгән уңайдан, экологик чиста продукциядә сатып алырга мөмкин», – диде Удмуртия Рес­публикасы Хөкүмәте Рәисе Ольга Абрамова.
«Бу ноктаны ачу өстендә эш­лә­­гәндә, иң беренче чи­рат­та Удмуртиядә «Безнең фер­мер» кооперативы төзе­дек. Аннан коо­пе­ративка рес­пуб­­ликабызда төрле продукция җи­тештерүчеләрне туплап, аларга оештыру һәм документ эшләре белән генә түгел, ә продукцияләрен киш­тә­ләргә урнаштырганчы ярдәм иттек. Киләчәктә дә без алар­ны ташламыйбыз, эшләрен ка­милләштерүдә, килеп туган авыр­лыкларны чишүдә ярдәм итә­чәкбез. Минем әлеге сату ноктасында татар милли ашларын да, хәләл ризыклар җитеш­те­рүчеләрне дә күрәсем килә», – дип сөйләде Ижаудагы «Фер­­мер утраучыгы» проектының җитәкчесе Рөстәм Гафуров.
Зур көч куеп җитештерелгән продукцияләренең «Пятерочка» кебек зур сәүдә ноктасында саты­луына эшмәкәрләр бик шат. «Иң мөһиме: бу проект дәвамлы булсын, шәһәрнең бер генә кибетендә түгел, һәр районында җирле сыйфатлы продукцияне сату мөмкинлеге булсын иде», – диләр эшмәкәрләр.
Кулланучылар өчен бүгенге көн­дә тәкъдим ителгән продукция күптөрлелеге белән аерылып тора.Төрле сыек майлар, колбасалар, сөт өсте, йогурт, сөт, бал ризыклары, пилмәннәр арасында хәтта мин моңа кадәр сатуда күрмәгән Удмуртия өчен уникаль продуктлар – тавык-корнишоннар (300-400 граммлы тавыклар) да бар. Авыл хуҗалыгы фермерлары кооперативы ярдәмендә сатуга куелган әлеге продуктларның бәяләре дә гади халыкның буе җитәрдәй дип уйлыйм. Чөнки проектның максаты – җи­теш­те­рүчеләрнең продукциянен кул­ланучыга бәяләрен арттыр­мыйча сату.
Башланган эшнең халык өчен дә, җитештерүчеләр өчен дә фай­далы булуын телисе килә. Бү­генге көндә ниндидер нәтиҗә ясарга әле иртәрәк.

Гүзәл Шакирова.