Рөстәм Ямалиев: «Туган як үзенә тарта»

Салагыш авылында Мәскәү эшмәкәре, “Татар штабы” җитәкчесе Рөстәм Ямалиев ифтар ашы уздырды.

Бу чарага Казан, Чаллы, Түбән Кама, Әгерҗе, Ижау калаларыннан, районыбызның Красный Бор, Кичкетаң, Ямурза, Уразай, Салагыш авылларыннан Ямалиевның туганнары, якыннары – 50гә якын кардәшебез килде.
Вәгазьне Уразайдан Бибел хәзрәт Иб­раһимов укыды. Җәннәткә керүне өмет итеп, җәһәннәм утыннан куркып, дини кануннар буенча гомер кичерергә кирәклеге турында бик үтемле итеп сөйләде ул. Моңлы азан яңгыраганнан соң авыз ачкач, ахшам намазы укылып, дога кылынды. Ифтарда Коръән аятьләре дә укылды.
Рөстәм Фаиз улы изге ашка килүчеләргә, Салагыш авыл җирлеге башлыгы Мансур Мөхәммәдиевка, имам-хатиб Данис хәзрәт Халитовка, аш-су осталарына, ерак араларны якын итеп кайткан туганнарына рәхмәт әйтте. Мондый чарада балаларның һәм яшьләрнең елдан-ел артуына сөенүен белдерде. Мәскәүдәге “Татар штабы”ның киләчәктә дә телебезне, традицияләребезне, мәдәниятебезне саклап калу һәм үстерү юнәлешендә зур максатлар куеп, армый-талмый хезмәт итәчәген хәбәр итте. Ул кунакларга журналлар, китаплар һәм газеталар бүләк итте.
Ифтар ашында Бөтендөнья татар конгрессы җитәкчесе урынбасары Марс Тукаев та катнашты. “Август аенда Бөтендөнья татар конгрессының 30 еллыгын бәйрәм итәргә җыенабыз. Мәскәүдән 18 кешелек делегеция составында милләт һәм туган тел язмышы өчен янып яшәүче, искиткеч талантлы оештыручы-җитәкче, зур шәхес Рөстәм Ямалиев та бар. Бу – аның милләтебез каршында башкарган эшләренең зурлыгын бәяләү һәм аңа хөрмәт билгесе”, – диде Марс Тукаев.
Изге ашка килгән һәр мөселман, барлык туганнары исеменнән әтисенең энесе Фәем ага, республика мәдәният хезмәткәрләре исеменнән Әлфия Хәбибуллина Казан артистларын Мәскәүдә каршы алучы һәм гастрольләрен оештыруда ярдәм итүче фидакарь зат Рөстәм Ямалиевка эшендә уңышлар, үзенә һәм якыннарына сәламәтлек теләделәр.

Асия КОРБАНГАЛИЕВА, Әгерҗе шәһәре.