Сөй гомерне, сөй халыкны, сөй халыкның дөньясын!



Котлыйбыз


Баш бит - Хәбәрләр - Игорь Комаров: «Илебез тарихында Ислам диненең роле зур»
21.05.2022

Игорь Комаров: «Илебез тарихында Ислам диненең роле зур»

20 май көнне Казанда РФ Президентының Идел буе федераль округындагы тулы вәкаләтле вәкиле Игорь Комаров «Россия – Ислам дөньясы» стратегик караш төркеменең пленар утырышында катнашты.

Чара Казан Ратушасында уз­ды. Россиянең этномәдәни күп­төрлелеген һәм милләтара тату­лыкны саклауда тәҗрибә уртаклашу өчен төрле илләрдән 100гә якын вәкил җыелды. Алар арасында Алжир, Бәһрәйн, Мисыр, Индонезия, Иордания, Гыйрак, Сенегал, Сирия, Төркия, Тунис һәм башка илләрдән вәкилләр бар иде. Аларның кай­берләре видеоэлемтә буенча ку­шыл­ды.
Утырыш Коръән укудан баш­ланды. РФ Хөкүмәте Рәисе урын­басары Марат Хөснуллин Пре­зидент Владимир Путинның Котлау хатын укыды.
«Идел буе Болгарстаны тара­фыннан Ислам динен кабул итү илебез тарихында мөһим этап­ларның берсе булды. Аның күп динле дәүләт буларак оешуына зур йогынты ясады. Россиянең бердәм күпмилләтле булып формалашуында мөһим роль уй­нады. Гасырлар дәвамында Россия мөселманнары ил үсешенә зур өлеш кертә. Аларның төрле өлкәләрдәге ачык казанышлары – безнең бай тарихи, фәнни, мәдәни һәм рухи мирасыбызның аерылгысыз өлеше. Россия мөселманнарының хәзерге буыны ата-бабаларының гореф-гадәтләренә хөрмәт белән карый, аларның Ватанга намуслы хезмәт итү васыятьләренә, патриотизм һәм гаделлекнең югары идеалларына тугрылыкларын саклый. Бу чаралар фикер алышуларга, шулай ук яңа перспективалы һәм файдалы ини­циативаларны эшләтеп җибәрүгә ярдәм итәр дип ышанам», – диелә дәүләт Башлыгы мөрәҗәгатендә.
РФ Президентының Идел буе федераль округындагы тулы вә­ка­ләтле вәкил Игорь Комаров: «Сезне Россия һәм Идел буе фе­де­раль округы Ислам мәдәнияте үзәкләренең берсе булган Казанда сәламләвемә шатмын. Идел буе бүген Гомумроссия гражданнар тәңгәллеген үстерү һәм Россия халыкларының традицион кыйм­мәтләрен саклау арасында баланс үрнәге булып тора. Казан – Идел буе федераль округының Ислам мәдәнияте үзәкләренең берсе. Ислам һәм христианлыкның төп дини конфессияләре 500 елга якын тату яши. Бу төрле мәдәният вәкилләре арасында үзара аңлашу өчен уңай шартлар тудырды», – диде кунакларны сәламләп.
Россия Федерациясе Прези-дентының тулы вәкаләтле вәкиле билгеләп үткәнчә, Идел буенда мөселман динен тотучы 6 млн кеше яши; 3,5 меңнән артык мөселман дини оешмасы һәм 26 Ислам дини уку йорты теркәлгән. Россиядә һәм Идел буе федераль округы төбәкләрендә халыкларның мә­дә­ниятен нәтиҗәле үстерергә барлык мөмкинлекләр дә туды­рылган. Сүз мәгариф сис­те­ма­сы, гражданлык җәмгыяте инс­ти­тутлары, массакүләм мәгъ­лүмат чаралары һәм социаль чел­тәрләрдә традицион мәдә­ниятне цифрлаштыру буенча интен­сив үсеш алган нәтиҗәләр турында бара», – диде ул.
Вәкаләтле вәкил хакимият органнарының грант бәйгеләре, ресурслар белән тәэмин итү һәм мәдәни күптөрлелекне саклап калуны субсидияләү аша ярдәм күрсәткәнен билгеләп үтте.
«Россия – Ислам дөньясы» стра­тегик караш төркеме кыса­ларында бүгенге дискуссия безгә элемтәләрне ныгытырга ярдәм итәчәк һәм яңа уңышлы уртак проектлар башлануга этәргеч бирәчәк. Идел буе федераль округы бу башлангычларны гамәлгә ашыру өчен мәйданчык булырга әзер», – диде Игорь Ко­маров.
Алга таба Татарстан Респуб-ликасы Президенты, «Россия – Ислам дөньясы» стратегик караш төркеме рәисе Рөстәм Миңнеханов, Федерация Советының Халыкара эшләр буенча комитеты рәисе урынбасары Фәрит Мөхәммәтшин, Татарстан Республикасы Дәү­ләт киңәшчесе, Татарстан Респуб­ликасының Беренче Президенты Минтимер Шәймиев, РФ мөсел­ман­нарының Диния нәзарәте рәисе, Россия мөфтиләре советы рәисе Равил хәзрәт Гайнетдин, Баш мөфти, Россия мөселманнарының Үзәк Диния нәзарәте рәисе Тәлгать хәзрәт Таҗетдин чыгышлары тыңланды.
«Киләсе елда Россия Феде­рациясе Президенты Влади­мир Путинның Малайзиягә визи­тына 20 ел тула. Хәзерге вакытта юбилей датасына багышланган «Россия – Ислам дөньясы» стра­тегик караш төркеме утырышын Малайзия башкаласы Куала-Лумпурда оештыру буенча эш алып барыла. Бүгенге утырыш темасын төркемнең бурычлары таләп итә, шулай ук милләтара һәм конфессияара мөнәсәбәтләр өлкәсендә барган катлаулы про­цесслар белән бәйле, бөтен кешелек өчен чакыру булып тора», – дип билгеләп үтте үз чыгы­шында Рөстәм Миңнеханов. Утырышның максаты – дөнья җәмә­гать­че­ле­генә илебезнең Россия гомум­гражданлык бер­дәм­­­легенең көчен күрсәтү. Дискуссияләр бары­шында мәдәни күптөрлелекне, толерантлык традицияләрен сак­лау һәм төрле халыклар, мәдәният һәм дин вәкилләренең конструктив хезмәттәшлеген җайга салу стра­тегиясе каралды; илебез һәм чит илләрнең цивилизацияләр диа­логын булдыру тәҗрибәсен исәпкә алып, глобаль үсеш трендлары контекстында актуаль карарлар һәм тәкъдимнәр буенча фикер алышынды.