Яңалыклар

Яшьләр сәясәтен үстерүгә – 153 миллион сум акча

Россия субъектларында яшьләр сәя­сәтен комплекслы үстерү программаларының Бөтенроссия конкурсы нәтиҗәләре буенча Удмуртия 153 миллион сум күләмендә суб­сидия алачак. Бу акчаларга Ижау, Можга, Сарапул, Воткинск һәм Глазов шәһәрләрендә яшьләр үзәкләре булдыру, яшьләр сәясәте белгечләренә укулар оештыру һәм республика яшьләре өчен төрле чаралар уздыру каралган.

Тимер юл вокзалы яны матурланды

Ижауның Тимер юл вокзалы каршындагы мәйданда төзекләндерү эшләре тә­мам­ланды. Биредә тротуарлар, вокзалга керү юл­лары,машина кую урыннары ре­монтланды. Шәһәрара автобуслар тук­талышы ясалды. Шулай ук вокзалның төп бинасына керү төркеменең пандуслары һәм баскычлары да төзекләндерелде. Планлаштырылган эшләрнең чираттагы этабы вокзал би­наларының эчендә баш­карылачак. Проект кысаларында яңа эс­кәмияләр урнаштыру, ике бинаның да фасадларында яктырткычларны алыштыру, касса залларын инвалид коляс­каларында хәрәкәтләнүче кешеләр өчен махсус түбән тәрәзәләр белән җиһазландыру, пандуслар урнаштыру каралган. Шунысын да мөһим: барлык төзекләндерү эшләре физик мөмкинлекләре чикләнгән кешеләрнең мәнфәгатьләрен исәпкә алып башкарыла. Бу эшләр белән беррәттән, Гагарин урамын ремонтлау да дәвам итәчәк.
Вокзал комплексын яңарту агымдагы елның ахырында тәмамланачак дип көтелә.

Удмурт дәүләт аграр университеты барлыкка килде

Россия Федерациясе Авыл хуҗалыгы министры урынбасары боерыгы нигезендә Ижау авыл хуҗалыгы академиясенә Удмурт дәүләт аграр университеты исеме бирелде. «Уку йортының әзерлек юнәлешләре ара­сында авыл хуҗалыгыннан тыш, электр энергетикасы, гамәли информатика, икътисад, меха­никалаштыру, инженерлык мәсьәләләре һәм башка бик күп юнәлешләр бар. Болар безгә тулы хокуклы университет булып саналырга нигез бирә», – ди Удмурт аграр дәүләт университеты ректоры.