Яшьләр икеләнергә урын калдырмый

Ижауның “Иман” татар яшьлә­ре берлеге активистлары Мәскәү татарлары штабы лидеры Таһир Мө­хәммәтдинов белән очраштылар.
Бу көнне яшьләрнең уртага салып сөйләшердәй сүзләре күп булды. Милли тормышка һәркем үз өлешен кертергә тырыша. Ижауның медицина академиясе студенты Ильяс Хәбибуллин: “Мин үзем Мамадыш районыннан. Удмуртиягә укырга килгәч, монда татарларның бердәм һәм актив булуын күреп сөендем. Уку йортында татар яшь­ләре белән туган телдә аралашырга тырышабыз. Үзем бик күп төрле милли чараларда катнашам, “Иман” татар яшьләре берлегенә йөрим. Милләт үсешенә тагын да зуррак өлешемне кертәсем килә. Мин “4 батыр” дигән фэнтези роман яз­дым. Анда төрле татар легендаларыннан персонажларны кушып, Болгар тарихын да кертеп, туган якны яклау турында кызыклы сюжет булдырдым. Китап инде әзер, ләкин әле чыкмаган, тиздән басылуын көтәбез”, — ди Ильяс.

Бүгенге көндә актуаль мәсьә­­ләләрнең тагын берсе – 2021 елда халык санын алу кампаниясендә яшьләрнең актив катнашуына ирешү. Очрашуда шул туры­да сөйләштеләр. “Бары тик җани­сәп уздырыл­гач кына, иле­без­дә яшәүче татарлар санын тө­­гәл белеп була”, — ди Таһир Мөхәммәтдинов. Тик яшьләр ике­ләнергә урын калдырмыйлар – үзләрен бары тик “татар” дип яздырачаклар.
“Мин Ижауда туып-үстем, татар гимназиясендә укы­дым һәм кечкенәдән татар мохитендә кайнадым. Хәзер дә “Иман” татар яшьләре берлегеннән аерылмыйм, барлык чараларда актив катнашам. Әлбәттә, үземнең милләтем өчен борчылам. Аеруча халык санын алуда сынатмасак иде. Милләттәшләрем үзләрен «татар» дип яздырсыннар иде. Шуңа күрә мондый очрашулар бик кирәкле дип саныйм”, — диде “Иман” татар яшьләре берлеге әгъзасы Гүзәл Зарифуллина.

Мәскәү татарлары штабы тарафыннан Халык санын алуга юнәлтелгән очрашулар Ижауда гына түгел, ә Казан һәм Санкт- Пе­тербург татар яшьләре белән дә уздырылган. “Элек паспортта милләтне күрсәтә торган графа бар иде. Хәзер анысы да юк. Шуңа күрә без яшьләр дә, өлкәннәр дә үзләрен “татар” дип язсыннар өчен, алар арасында агитация алып барабыз. Хәзерге вакытта катнаш гаиләләр дә бик күп. Күпләр үзләрен кем дип яздырырга белмиләр. Без аларга да ярдәм итәбез”, — дип сөйләде Таһир Мөхәммәтдинов.

Ә менә Ижау шәһәрендә яшәү­че Никита Медведев гаиләсендә мондый икеләнүләр юк. Катнаш гаиләдә үссә дә, 15 яшьлек егет үзен чын татар дип саный. Никитаны татар концертларына йөргән милләттәшләребез яхшы белә. Ул сәхнәгә чыгып, Казан артистлары белән татар телендә җырларга, биергә оялып тормый. Инде 5 елдан артык «Асылъяр” җыр һәм бию ансамблендә шөгыльләнә, баянда милли көйләр уйный, үзлегеннән татар телен өйрәнә. “Үз-үзен бе­лә башлаганнан бирле Никита: “Мин — татар”, — ди. Милли гореф-гадәтләр, мәдәният, сәнгать белән нык кызыксына. Чәкчәк һәм бәлеш пешерә белә. Иң зур теләге – татар телендә иркен аралашырга өйрәнү. «Әле аңа 18 яшь тулмаган, аның милләтен үзем язачакмын. Әлбәттә, “татар” дип”, — ди әнисе Альбина. “Мин татар булуым белән горурланам, миңа татар булуы ошый. Төрле милли ризыклар пешерергә була, күптөрле җырлар, биюләр өйрәнәм. “Асылъ­яр” ансамблендә шөгыльләнгәч, мөмкинлекләр дә бар”, — ди Никита.

Мондый яшьләрне хәтта өл­кән­нәргә дә үрнәк итеп куярлык. Милләтебезне яраталар, татар булуларыннан оялмыйлар, тел­не һәм гореф-гадәтләрне сак­лауга үзләренең зур өлешләрен кертәләр. Сентябрь аенда узачак Халык санын алу кампаниясендә һәркем катнашсын һәм үзлә­ренең татар булуларын исләрендә тотсыннар иде!

Эльвира Хуҗина.