Сынатмадык

Апрель ахырында Сарапул шәһәренең “Электрон” мә­дәният йортында милли оешмалар арасында VIII спорт фестиваленең ахыргы этап­лары уздырылды. Без бу көнне шаффлборд*, джакколо*, кульбутто*, корн­холл* дип аталган өстәл уеннарында үз көчебезне сынап карадык һәм сынатмадык. Өстәл уеннарында Сарапул “Иман” татар яшьләре берлеге беренчелекне яулады. Яшьләр оешмалары җитәкчеләре арасында уздырыл­ган пневматик винтовкадан атуда беренче урын шулай ук безнеке булды. Гомуми зачетта 3нче урынга лаек булдык. Мондый кызык­лы, милләтара дус­лыкны ныгытучы чара уздырганнары өчен оештыручыларга бик зур рәхмәт әйтәбез.

*Шаффлборд – махсус сызыклар белән бүленгән өстәлдә алкалар белән уйный торган уен. Кагыйдә буенча алкаларны кул белән этәргә кирәк һәм алар билгеләнгән сызыктан узмаска тиеш.
*Джакколо – Германиядә барлыкка килгән өстәл уены. Кагыйдә буенча уенчы 30 фишканы 3 уенда махсус чокырчыкка кертеп бетерергә тиеш.
* Кульбутто – махсус әйләнә торган өстәлдә шарларны тиешле чокырга кертү уены.
* Корнхолл – америкалыларның иң борынгы өстәл уеннарының берсе. Корнхолл уены турында беренче тапкыр әле XIV гасырда искә алына. Уен кагыйдәсе гади: кечкенә капчыкларны ыргыткач, алар өстәлдәге тишеккә эләгергә тиеш.

Рөстәм Сөләйманов, Сарапул “Иман” татар яшьләре берлеге рәисе.