Камил Габдуллин: “Эшебезне бәяләделәр”

Можгадан Камил Габдуллин РФ Дәү­ләт Думасының Милли эшләр буенча ко­митетының Рәхмәт хаты белән бүләкләнде.
Шушы көннәрдә Мәс­кәүдә “Без — Рос­сиялеләр” Рос­сия халыклары Яшьләр Ассамб­леясенең IV отчет — сайлау конференциясе узды.
Конференция эшендә РФ­нең 83 субъектыннан кил­гән яшьләр оешмаларында эшләүче яшь лидерлар, активистлар, җирле идарә һәм хакимият идарәсе органнары вәкилләре, журналистлар, эшмәкәрләр катнашты. РФ Дәүләт Думасының Милли эшләр буенча комитеты рәисе Илдар Гыйльметдинов сәламләү сүзе белән чыгыш ясады. Ул Яшьләр Ассамблеясенең Россиядә милләтара дуслыкны ныгытуга зур өлеш кертүен билгеләп үтте.
Әлеге конференциядә Можга егете Камил Габдуллин Яшьләр Ассамблеясенең Үзәк Координацион Советының 2015-2017 еллардагы эше турында сөйләде. Башкарган эше өчен ул Рәхмәт хаты белән бүләкләнде. “Бу Рәхмәт хаты безнең күп еллар дәвамында алып барган эшебезгә җитди бәя бирү булды. Без үзебезнең дөрес юлдан барыуыбызны аңладык һәм максатыбызга ирешү өчен барлык көчебезне куячакбыз. Әлеге Рәхмәт хаты минем эшемне генә түгел, ә бөтен командабызның хезмәтен бәяләү дигән сүз”, — диде Камил.