Ил Башлыгы үз фатихасын бирде

31 майда Удмуртия Башлыгы Александр Бречалов илебез Президенты Владимир Путин белән видеоконференция режимында очрашып, республиканың социаль-икътисади үсеше белән таныштырды.

Александр Бречалов төбәктә башкарылган эшләр турында кыс­кача сөйләп узды. «Сәламәтлек саклау өлкәсенә килгәндә, коро­на­ви­рус белән авыручылар саны кимеде, барлык медицина уч­реждениеләребез дә үз режим­нарында эшли. «Сәламәтлек саклау» милли проекты ярдәмендә 5 ел эчендә 90 фельдшер-акушерлык пункты ачылды, ике амбулатория төзелде, Ижауның Ленин районында поликлиника төзелеше тәмамланды, 349 берәмлек медицина җиһазлары кайтарылды һәм 149 ашыгыч медицина ярдәме автомобиле сатып алынды. «Бердәм Россия» ярдәме белән узган елда хастаханәләрне һәм поликлиникаларны капиталь төзекләндерүгә өстәмә рәвештә 440 миллион сум акча бүлеп бирелде.
Мәгариф өлкәсендә «Демо­графия» һәм «Мәгариф» илкүләм проектлары ярдәмендә без 5 ел эчендә 52 балалар бакчасы һәм 10 мәктәп төзедек. Быел 9 мәктәпне ремонтлау, ә 2024 елга 22 мәктәпне төзекләндерүне планга керттек.
Хезмәт базарындагы хәл тот­рыклы. 1 майга 6000гә якын рәс­ми эшсез кеше теркәлгән. Ә вакан­сияләр саны 17 меңгә якын.
Икътисадыбыз үсеш юлында: узган ел башыннан кече һәм урта бизнес субъектлары саны 3000гә артты. Алардан бюджетка кергән салым 6 млрд сумга якын булды.
Удмуртия – Россиянең оборона калканы. Бездә 12 оборона-сәнә­гать комплексы предприятиесе бар. Сәнәгать оешмалары яңа та­ләпләргә уңышлы җайлаша. Ижау механика заводы 3000 элек­тро­кардиостимулятор җитеш­те­рә алыр­га сәләтле, ә Сарапул элек­тро­генератор заводы 17 майда трамвайлар өчен двигательләр җитештерә башлады. Болар бары­сы да – импортны алыштыру мисал­­лары. Воткинск заводына булган игътибарыгыз өчен рәх­мәт җиткерәсе килә. Юрий Борисов Дмитрий Рогозин белән очрашканнан соң, предприятиене үстерү буенча «Юл картасы» имзаланды. Бүген заводта эш өч сменада оештырылган. Уртача хезмәт хакы – 53 мең сум. Биредә 500дән артык вакансия ачылды.
Узган ел республикада Авыл елы дип игълан иткән идек. Удмуртия – сөт җитештерү буенча лидерлар рәтендә. Пихтовка авылында Россия Авыл хуҗалыгы министрлыгы һәм Сбербанк белән берлектә «Киләчәк авылы» проектын гамәлгә ашырдык. Әлеге проектның авылда яшәү сыйфатын яхшы якка үзгәртүенә инандык», – диде Александр Бре­ча­лов.
Һәр очрашуда Республика Баш­­лыгы Владимир Путинны Уд­муртиядә җитештерелә торган про­дукция белән таныштыра. Бу юлы ул Сарапулда җитештерелгән рапс мае турында сөйләде.
Очрашу ахырында Владимир Путин Удмуртиядә сәнәгать җи­теш­­терүенең дә, төзелеш сек­то­рының да яхшы темплар белән үсүен билгеләп үтте. «Тузган то­раклар саны да, эшсезлек дә­рәҗәсе дә, башка төбәкләр бе­лән чагыштырганда, түбәнрәк. Бо­лар бик яхшы күрсәткечләр, тик аларның кәгазьдә түгел, ә чын­лыкта тормышка ашырылган булуы мөһим. Республика халкы бу уңай тенденцияләрне сизәргә һәм бәя­ләргә тиеш. Әлбәттә, сезнең яктан өстәмә игътибар таләп итә торган мәсьәләләр дә бар. Ярдәм кирәк тармакларны игътибар үзә­гендә тотыгыз. Ә гомумән ал­ганда, мин сезгә хезмәтегез өчен рәхмәт белдерәм һәм уңышлар телим», – диде. Дәүләт Советы Рәисе Владимир Невоструев: «Владимир Путин Александр Бречаловның сентябрьдә узачак Республика Башлыгын сайлауда үз кандидатурасын тәкъдим итүен хуплады. Без республикадагы ирешелгән уңышларны күрәбез. Александр Бречаловның 5 ел дә­ва­мында туплаган тәҗрибәсе ки­лә­чәктә республика үсеше өчен хезмәттә кирәк һәм терәк булачак», – диде.
Удмуртия Республикасы Иҗти­магый палатасы әгъзасы Раил Га­лиәхмәтов: «Владимир Путин Удмуртия Башлыгы Александр Бречаловның эшен югары бәя­ләде. Дөрестән дә, соңгы 5 ел эчендә республиканың төрле тар­маклары динамик рәвештә үсә. Икътисадка да аерым игътибар бирелә. Кертелгән санкцияләр һәм импортны алыштыру зарурлыгы предприятиеләребезне тиз арада яңа шартларда эшләргә мәҗбүр итте. Эшмәкәрләргә дә ярдәм ча­ралары күрсәтелә», – диде, әлеге очрашудан соң туган фикерләре белән уртаклашып.
Әлбәттә, рес­публикада булган үзгәрешләр – һәркемнең күз алдында. Кайбер тармаклардагы уңышлар белән беррәттән игътибар таләп итүче, хәл ителүне көтүче мәсьәләләр дә шактый. Аларга да чират җитәр дигән теләктә калабыз.