Буыннарны берләштерүче бәйрәм

5 мең кеше әтиләр һәм уллар хорында җырлады.

Бәйрәм көне чараларга бик бай булды. Әтиләр һәм уллар Ижау буасы ярына Бөек Ватан сугышы каһарманнары истә­ле­ген хөрмәтләү һәм Җиңү хакында җырлар башкару өчен бер­гә җыелдылар. Концертны ка­раучыларның берсе – Удмуртия Рес­публикасы Башлыгы Александр Бречалов булды. «Бу проектның инициаторы – Удмуртия әтиләре советы. Ел ярым эчендә акция меңләгән шәһәр халкын җыйды. Быел аталар һәм уллар хоры проекты Удмуртия шәһәрләрендә һәм районнарында да дәвам итә», – диде. Узган ел 9 майда 900 кешелек ирләр хоры Ижау Үзәк мәйданында сугыш еллары җырларын башкарган булса, бу юлы хор буа ярындагы зур концерт мәйданчыгына 5 меңгә якын кешене җыйды.

Һәм бу акция дәвам итәчәк. «Әтиләр һәм уллар хоры – төрле буын ке­ше­ләрен берләштерү һәм баба­ларыбызның батырлыклары турында истәлекләрне саклап калу үрнәге. Бигрәк тә хәзер берләшергә һәм бу батырлыкларның ни өчен эшләнгәнен искә төшерергә кирәк», – диде Удмуртия Республикасы Әтиләр советы рәисе, Ижау хакимияте башлыгының социаль сәясәт буенча урынбасары Дмитрий Чис­тяков. Әтиләр һәм уллар хоры акциясе улыбыз Камил укый торган 86 нчы лицейда инде берничә ел уза. Аның сыйныфыннан без икебез катнаштык. Мәктәптә узган акциядә 5 җыр җырладык. Кызлар әлеге җырларга биюләр башкардылар. Быел әлеге акциядә икенче тапкыр катнашуыбыз. Бабайларыбызның фо­то­ларын күтәреп чыктык. Җырлаганда, бабай­ларыбыз күз алдында торды. Бабаларыбыз, туганнарыбыз илебез иминлеге, тынычлыгы өчен гомерләрен кызганмыйча көрәшкәннәр, җыр­ларыбыз аларның рухына дога булып ирешсен иде. Безнең балаларыбыз да аларның батырлыкларын белеп үссеннәр, хөрмәт итсеннәр», – диде хорда катнашкан Марат Исламов.

Гөлнара Вәлиева.