Без дә булдыра алабыз

Вараксино поселогында гомер итүче Мидхәт Шакиров чит җирләрдән килгән товарларга кызыкмый. Ул бакчасында үз ысулы белән кыярлар үстерә.

Бүген азык-төлек сыйфаты замананың иң глобаль проблемаларының берсенә әверелде. Минем белән күпләр килешер дип уйлыйм. Аллага шөкер, кибетләрдә товарга кытлык юк.
Бар да бар, акчаң гына булсын. Игътибар итсә­гез, ризыклар каян гына китерелми. Алар тышкы кыяфәтен үзгәртми, бозмый гына ерак араларны үтсен өчен нинди эшкәртүләргә дучар булганнардыр, бер Ходайга гына билгеле. Консервант, ясалма буяу, хуш исләр белән баетылган азык-төлек кешегә файда урынына зыянны күбрәк китерәдер дип, мин җиләк-җимеш, яшелчәләрне үзе­­без­дә үстерелгәннәрен яи­сә күрше республикалардан ките­релгәннәрен алыр­га тырышам. Чөнки ерактан килмәгәч, химик эшкәртүләрне күрми бу ризык­лар.
Күптән түгел Уфада булырга туры килде. Анда “Башкортстан продукты” дигән проект эшли икән. Исеменнән үк аңлашыла, республикада җитештерелгән товарлар, азык-төлек турында сүз. Сатуга куелган продукциянең кабында, я төргәгендәге “Башкортстан продукты” дигән язу, әйбернең нәкъ монда эшләнгәнен генә белдерми, ә аерым сыйфат билгесе дә булып тора. Чөнки продукция сыйфаты махсус лабораториядә 3 ай саен тикшерелеп, аңа махсус билге сугыла икән. Җитешсезлекләр ачыкланса, товар сатуга чыгарылмый.
Сатып алучыга товарның эти­кеткасына карарга, кайчанга кадәр яраклы икәнлегенә игътибар итәргә, кайда һәм кем чыгарганын гына белергә кирәк.
Тагын шунысын әйтәсем ки­лә: Башкортстан бездән ерак түгел, без — күршеләр. Аннан безгә кыяр-помидор китерәләр, күркә ите сата торган кибетләре дә бар Ижауда. Тик бер сорауга җавап таба алмыйм: без дә алар кебек үстерә, җитештерә алмыйбызмыни? Я эшләргә те­лә­мибезме?

Дилфәр Хәсәнов, Ижау шәһәре.