Сөй гомерне, сөй халыкны, сөй халыкның дөньясын!



Котлыйбыз


Баш бит - Яшьлек адымы - Җиңүгә илткән юл
18.07.2018

Җиңүгә илткән юл

Чая, кыю замана яшьләре алга омтылып яшиләр. Россия чемпионы Дамир Тимершин да шундыйларның берсе.

17 яшьлек Дамирның 33 медале бар, шуларның тугызын Россиякүләм ярышларда яулаган. Ул – ГТО билгесе иясе. 2016 елда Гадәттән тыш хәлләр министрлыгы тарафыннан Мордовия республикасы Саранск шәһәрендә “Яшь коткаручы” ярышлары уза. Кыр лагеренда алар командалар белән 2 атна палаткаларда яшәп, төрле конкурсларда үз көчләрен сынап карыйлар. Тизлеккә йөгерү, носилкада яткан “яралы” кешене күтәреп йөрү кебек биремнәрнең барысын да үтәп, аларның командасы I урынга лаек була, Россия чемпионы исемен яулыйлар.
Дамир шәһәркүләм үткәрелгән бокс һәм катнаш көрәш ярышларында да беренчелекне бирми. Әле быел 19-22 июнь көннәрендә Ижауда ХХ җәйге ял куркынычсызлыгы турнирында катнашып, республика буенча шәхси ярышта – II, ә команда белән – III урынга лаек булалар.
Дамирның теләге – һәрвакыт беренче булу. Яшь егетнең бу максаты, әлбәттә, үз җимешләрен бирер. Быел ул мәктәпне тәмамлап, документларын Сарапул педагогия колледжының “Физкультура һәм спорт” бүлегенә тапшырган. “Теләгем – шул юнәлештә белем алып, тормышымны тулысынча спорт белән бәйләү”, — ди әңгәмәдәшем. Хыялы да бар – катнаш көрәш буенча үзенең шәхси спорт мәктәбен ачу.
Дамир әби-бабай тәрбиясе алып үскән. Андыйлар үзләренең миһербанлырак булулары белән аерылып торалар. Әби-бабайдан татарча сөйләшергә өйрәнгән. 47 ел шофер булып эшләгән таләпчән Хәбир бабасы аны тәртипле, тырыш булырга өйрәтсә, әбисе Рәсимә чисталык-пөхтәлеккә, өлкәннәрне хөрмәтләргә өнди. Спортка мәхәббәтне дә Дамирда әби-бабай тәрбияли. Рәсимә апа – футбол җанатары. Дөнья чемпионатын бер дә калдырмый карап барган!
Тырыш, кечкенәдән үз максатына ирешергә омтылган Дамир әби-бабасының да, әти-әнисенең дә йөзенә кызыллык китермәс.

Асия Әхмәдиева, Сарапул шәһәре.