Сөй гомерне, сөй халыкны, сөй халыкның дөньясын!



Котлыйбыз


Баш бит - Милли тормыш - Сабантуй – дуслык күпере
6.07.2022

Сабантуй – дуслык күпере

2 июльдә Сарапул шәһәренең «Энергия» стадионында Сабантуй бәйрәме узды. Архив мәгълүматларына караганда, Сарапулда 1926 елда Сабантуй бәйрәмен үткәрү турында сорау күтәрелсә дә, ул 1928 елда гына үткәрелә. Аннан соң тарихта бәйрәмнең үткәрелгәне телгә алынмый. Шәһәр советы документларында беренче тапкыр Сабантуй бәйрәме 1991 елда үткәрелгән дип теркәлә. Аны Нәҗип Камалов, Рифкать Ситдыйков оештыралар.

Бәйрәмне Сарапул шәһәренең һәм Татарстан Республикасы Яңа Чишмә районының иҗат коллективлары ачып җибәрде. Шәһәрнең «Электрон» мәдәният йортында шөгыльләнүче коллективлар, үзеш­чәннәр, «Мирас», «Яшьлек» ан­самбле әгъзалары Сабантуйга ныклап әзерләнгәннәр. Мәйдан тутырып Татарстан Республикасы Яңа Чишмә районы сәнгать осталары килеп чыккач, татар моң-җырының, биюенең матурлыгына, күркәмлегенә сок­ланмаган тамашачы калмагандыр.
Быелгы бәйрәмнең тантаналы өлешендә Татарстан Республикасы Яңа Чишмә муниципаль районы башлыгы Вячеслав Козлов, Сарапул шәһәре башлыгы урынбасары Денис Шакиров, Сарапул татарларының милли-мәдәни автономиясе җитәкчесе Зөлфәт Арсланов, «Элеконд» заводының генераль директоры Анатолий Наумов, УР ның Дәүләт Советы депутаты Сергей Мусинов, «Удмуртская хлебная компания» җәмгыятенең генераль директоры Алексей Малюк, Татарстан Республикасының ветеринария идарәсе җитәкчесе Алмаз Хисаметдинов, Удмуртия татарларының мил­ли-мәдәни автономиясе рәисе Рәмзия Габбасова катнашты. Сарапул шәһәрендә төрле милләт вәкилләре яши. Сабантуй бәйрәмендә Халыклар дуслыгы йортыннан килгән төрле милләт вәкилләре дә үзләренең котлауларын җиткерделәр.
Көне буе Яңа Чишмә районының мәйданчыгы тамашачылар өчен остаханәләр үткәрде, район тарихы, гореф-гадәтләр белән таныштырды.
Сарапул шәһәренең Удмур­тиядә генә түгел, Россия күләмендә үзенең дан тоткан көрәшчеләре, спортчылары бар. Алар – Илдар Гыйльфанов, бертуган Тимур, Ринат Кәримовлар, бертуган Руслан, Ринат Нәбиевләр. Бу көрәшчеләрне мин инде күптәннән беләм. Якын-тирә авыл-шәһәр Сабантуйларында батыр калып, иңбаш­ларына иң зур бүләк – тәкә салып, күп мәйданнар әйләнгән егетләр алар. Ак сөлгеләр тотып, бил алышкан егетләрнең көч-гайрәтенә сокланып утырган кабатланмас мизгелләр Са­бан­туйларда гына буладыр шул. Көрәштә җиңүчеләргә Яңа Чишмә районы зур бүләкләрен тапшырды.
Җитәкчеләр киләчәктә Сарапул шәһәре белән Яңа Чишмә районының дуслыгын дәвам итү турында килештеләр. Ике төбәк арасында дуслыкка күпер салынды!
Мәүлидә Фәйрузова: «Яңа Чиш­мә районыннан килгән милләт­тәш­ләребез бәйрәмнең бизә­ге булдылар. Бай эчтәлекле хуҗалык үрнәге бәйрәмгә килгән һәр кеше­нең игьтибарын үзенә җәлеп итте. Матурдан-матур милли киемле милләттәшләребез мәйданга ямь өстәделәр. Үзләренең чыгышлары белән шәһәребез халкын ял иттерделәр. Татарстанның атказанган артисты Марсель Вәгыйзов хал­кы­бызның милли аһәңнәрен тамашачыларның йөрәкләренә үтеп керерлек итеп җиткерде. Барлык оештыручылар һәм тамашачылар исеменнән аларга зур рәхмәтләребезне җиткерәбез. Алдагы елларда да очрашулар насыйп булсын!»
Тамашачылар тарафыннан тәкъ­дим дә ишетелде. «Акшабариха елгасы янында үткәрелгән Сабан­туй бәйрәме бик матур, гади, җылы үтә иде безнең. Тау башына сибелгән тамашачының күплеге, мәйдандагы җырчы-биючеләрнең аллы-гөлле сәх­нә костюмнары – болар барысы да күңелләрдә бәйрәм рухы уята иде бит. Бәлки киләчәктә бәйрәмне шунда кайтарып булыр?» – дип, үз мөрәҗәгатьләрен җиткерделәр сарапул­лылар. Бирсен, Ходай! Килә­чәктә бу мәсьәләне хәл итәргә язсын.
Кичке Сабантуй исә һәрва­кыт­тагыча Гудок микрорайонында гөр­ләде. Биредә халык рәхәтләнеп кү­ңел ачты, җырлады. Биеде, уеннарда катнашты. Тамашачыларга Ижау шәһәреннән Светлана Тимершина, Рөстәм Егоров, Ильяс Бәдертдинов, Илгизәр Шакиров, Сарапулдан «Мирас» ансамбле, Асия Әхмәдиева, Гөлия Шакирова, Рифкать Шакиров, Таһир Маннанов, Зөлфәт Арсланов, Фәнил Шәйхетдинов, Әлфирә Насыйрова, Резедә Латыйпова җыр-моңнарын бүләк иттеләр.
Әнә шулай Сабантуйлар һәркай­сыбызга да киләсе елларга кадәр сакланачак бәйрәм рухы, күңел көрлеге, матур хатирәләр генә калдырып, исән-имин узып та китте!

Рәфилә Рәсүлева.