Сөй гомерне, сөй халыкны, сөй халыкның дөньясын!



Котлыйбыз


Баш бит - Белем һәм тәрбия - Ике идарәне берләштерәләр
20.09.2018

Ике идарәне берләштерәләр

Тиздән Ижау хакимиятенең Мәк­тәпкәчә тәрбия бирү идарәсе белән Мәгариф идарәсен берләштерәчәкләр. Бү­генге көндә идарә тармагында 17 юридик зат булса, 2 идарә берләшкәннән соң, 4кә калачак. Бу хакта журналистларга Ижау хакимияте җитәкчесе социаль сәясәте буенча урынбасары Дмитрий Чистяков хәбәр итте. Аның сүзләренчә, ике идарәне берләштерү нәти­җәсендә акча янга калачак. Янга калган акчалар балалар бакчаларын һәм мәктәпләрне төзекләндерүгә тотылачак. Бер­ләш­терү нәтиҗәсендә 10 бина (5818,6 кв.м мәйдан) бушап калачак. Бу биналарның бер өлеше укучыларга, икенче өлеше — балалар бакчасына, ә калган өлеше сатуга куелачак. Ә аннан кергән акчалар шулай ук мәктәпләрнең, балалар бакчаларының техник базасын ныгытуга юнәлдереләчәк. Берләштерү нәтиҗәсендә ида­рә структурасыннан — 9 һәм үзәкләштерелгән бухгалтериядән — 121 хезмәткәр эшләреннән кыс­картылачак. Гомумән, хезмәт хакы фондында 55,7 миллион сум акча янга калачак. “Без зур шәһәрләр тәҗрибәсен кулланып эш итәбез. Бер юнәлештә эшләүче идарәләрне берләштерү уңай нәтиҗә биргән”, — диде Дмитрий Чистяков.
«Ике идарәне берләштерү тәр­биячеләргә дә, укытучыларга да ка­гылмаячак. Бары идарәнең структарасында гына үзгәрешләр булачак. Без киләчәктә бердәм норматив базада эшләячәкбез”, — диде Ижау шәһәре хакимиятенең мәгариф идарәсе җитәкчесе Светлана Петрова.
Ике идарәне берләштерү буенча карар Шәһәр думасында кабул ителәчәк.

Рилия Закирова.